ការស្វែងយល់ពីប្រវត្តិសាស្រ្តពិត «សិស្សានុសិស្សវិទ្យាល័យអន្លង់វែង ធ្វើទស្សនកិច្ចសិក្សានៅសារមន្ទីរផ្ទះតាម៉ុក»
មជ្ឈមណ្ឌលសន្តិភាពអន្លង់វែង ថ្ងៃទី០១ ខែតុលា ឆ្នាំ២០២៦ ដើម្បីពង្រឹងចំណេះដឹងផ្នែកប្រវត្តិសាស្ត្រ និងការស្វែងយល់ឱ្យកាន់តែច្បាស់អំពីអតីតកាលរបស់ស្រុកកំណើតខ្លួន សិស្សានុសិស្សនៃវិទ្យាល័យអន្លង់វែងបានរៀបចំដំណើរទស្សនកិច្ចសិក្សាយ៉ាងសកម្មមួយទៅកាន់សារមន្ទីរប្រវត្តិសាស្ត្រផ្ទះតាម៉ុកដែលជាអតីតទីបញ្ជាការដ្ឋាន និងជាលំនៅឋានរបស់អតីតមេទ័ពខ្មែរក្រហមប្រចាំទិសស្រុកអន្លង់វែង ខេត្តឧត្តរមានជ័យ។
ដំណើរទស្សនកិច្ចសិក្សានេះ មិនត្រឹមតែជាការដើរកម្សាន្តនោះទេ ប៉ុន្តែវាជាថ្នាក់រៀនប្រវត្តិសាស្ត្រដ៏រស់រវើកមួយនៅក្រៅថ្នាក់រៀន។ យុវជនជំនាន់ក្រោយដែលភាគច្រើនជាកូនចៅរបស់អ្នករស់រានមានជីវិតពីរបបខ្មែរក្រហម បានឱកាសឈានជើងចូលទៅក្នុងទីតាំងប្រវត្តិសាស្ត្រពិតជាក់ស្តែង ដើម្បីផ្សារភ្ជាប់អ្វីដែលសិស្សានុសិស្សបានអាននៅក្នុងសៀវភៅពុម្ព ទៅនឹងភស្តុតាងជាក់ស្តែង។
នៅក្នុងអំឡុងពេលទស្សនា សិស្សានុសិស្សបានស្តាប់ការរៀបរាប់យ៉ាងលម្អិតពីមគ្គុទ្ទេសក៍ និងបានពិនិត្យមើលរូបថត ពិព័រណ៍ឯកសារ ក៏ដូចជាសំណង់អគារបេតុងប្រវត្តិសាស្ត្រដែលនៅសេសសល់។ ការមើលឃើញផ្ទាំងរូបភាព និងសម្ភារប្រើប្រាស់នានា បានជួយឱ្យសិស្សងាយយល់ និងទទួលយកការពិតនៃប្រវត្តិសាស្ត្រប្រកបដោយការពិចារណា និងការយល់ដឹងស៊ីជម្រៅ ជៀសវាងការចងចាំត្រឹមតែទ្រឹស្តីទទេៗ។
គួររំឮកផងដែរថា វិទ្យាល័យអន្លង់វែង ក៏មានទំនាក់ទំនងយ៉ាងស្អិតរមួតជាមួយប្រវត្តិសាស្ត្រតំបន់នេះដែរ ដោយសារតែបរិវេណសាលាបច្ចុប្បន្ន ធ្លាប់ជាអតីតទីបញ្ជាការនយោបាយ និងជាទីតាំងសំចតរថពាសដែករបស់កងទ័ពខ្មែរក្រហម ដែលមានអគារសិក្សាមួយខ្នងកម្ពស់៣ជាន់ និងមានចំនួន ១២បន្ទប់ ជាសមិទ្ធផលបន្សល់ទុកពីសម័យនោះ។ សាលានេះត្រូវបានសាងសង់ឡើងពីឥដ្ឋនៅថ្ងៃទី១ ខែមេសា ឆ្នាំ១៩៩៣ ហើយកាលពីសម័យខ្មែរក្រហម ទីនោះធ្លាប់ប្រើប្រាស់ជាសាលាបង្រៀនកុមារចាប់ពីថ្នាក់ទី១ ដល់ថ្នាក់ទី៥។ ការផ្លាស់ប្តូរពីទីតាំងសឹកសង្គ្រាមមកជាថ្នាលបណ្តុះបណ្តាលចំណេះដឹង និងការបើកទ្វារសារមន្ទីរផ្ទះតាម៉ុកឱ្យសិស្សចូលទស្សនា គឺជាសក្ខីភាពមួយបង្ហាញពីតម្លៃនៃសន្តិភាព និងការអប់រំ។
តាមរយៈការចុះស្វែងយល់ផ្ទាល់នេះ សិស្សានុសិស្សមិនត្រឹមតែទទួលបានចំណេះដឹងផ្នែកប្រវត្តិសាស្ត្រប៉ុណ្ណោះទេ ប៉ុន្តែថែមទាំងបានបណ្តុះស្មារតីស្រឡាញ់សន្តិភាព ការផ្សះផ្សាជាតិ និងការរួមចំណែកថែរក្សាការពារសមិទ្ធផលប្រវត្តិសាស្ត្រនៅក្នុងសហគមន៍របស់ខ្លួនឱ្យបានគង់វង្សសម្រាប់មនុស្សជំនាន់ក្រោយៗទៀត។
https://photos.app.goo.gl/Rz8wsiJSoNHjS8jJ7