ការលើកកម្ពស់សមភាពយេនឌ័រ និងការគាំទ្រអនាគតកុមារី នៅភូមិអូរស្វាយ នៃស្រុកបុរីអូរស្វាយ សែនជ័យ
នៅថ្ងៃទី១៣ ខែមីនា ឆ្នាំ២០២៦, អង្គការនារីដើម្បីសន្តិភាព បានរៀបចំវេទិកាអប់រំសហគមន៍ របស់គម្រោង «ក្មេងស្រីដឹកនាំសកម្មភាព»។ កម្មវិធីនេះ ត្រូវបានរៀបចំធ្វើឡើង ក្រោមសហការជាមួយ អគារមរតកសង្គមរាស្ត្រនិយម សម្តេចឪ-សម្តេចម៉ែ (បុរីអូរស្វាយ-សែនជ័យ) នៃព្រះរាជបណ្ណាល័យហ្លួងម៉ែ នៅក្រោម្លប់ស្វាយ តាមដងទន្លេមេគង្គ។ វេទិកាអប់រំសហគមន៍ នៅក្រោមដើមស្វាយមួយដើមធំ ក្បែរមាត់ទន្លេមេគង្គ មិនត្រឹមតែផ្ដល់ចំណេះដឹងដល់អ្នកចូលរួមប៉ុណ្ណោះទេ ប៉ុន្តែថែមទាំងផ្ដល់បរិយាកាសដ៏មនោរម្យជាមួយធម្មជាតិ និងទន្លេមេគង្គ។
គោលបំណងចម្បងនៃវេទិកាអប់រំសហគមន៍នេះ គឺជាការបញ្ជ្រាបការយល់ដឹងឲ្យកាន់តែស៊ីជម្រៅអំពី «ទស្សនទានយេនឌ័រ»។ តាមរយៈការពិភាក្សា និងការរៀបចំជាទម្រង់សំណួរ-ចម្លើយ អ្នកចូលរួមបានស្វែងយល់កាន់តែច្បាស់អំពីភាពខុសគ្នារវាង «ភេទ» (លក្ខណៈជីវសាស្ត្រពីកំណើត) និង «យេនឌ័រ» (តួនាទី និងការរំពឹងទុករបស់សង្គម)។ លើសពីនេះ កម្មវិធីបានជួយឱ្យសហគមន៍រួមគ្នាពិចារណា និងលុបបំបាត់ផ្នត់គំនិតអវិជ្ជមាន ដែលធ្លាប់ជាសម្ពាធរឹតត្បិតសិទ្ធិសេរីភាព និងបង្កជាការរើសអើងចំពោះស្ត្រី និងកុមារីនាពេលកន្លងមក។
ទន្ទឹមនឹងការផ្លាស់ប្តូរឥរិយាបថសង្គម កម្មវិធីក៏បានសង្កត់ធ្ងន់លើចំណុចយុទ្ធសាស្ត្រចំនួនពីរ៖ (១) ការគាំទ្រការសិក្សា និងវិជ្ជាជីវៈ៖ លើកទឹកចិត្តឱ្យមាតាបិតាក្លាយជា «ប្រព័ន្ធគាំទ្រដ៏រឹងមាំ» (Strong Support System) សម្រាប់កូនៗ ដោយផ្តល់ឱកាសឱ្យពួកគេទទួលបានការអប់រំជាន់ខ្ពស់ និងមានសេរីភាពពេញលេញក្នុងការជ្រើសរើសវិថីវិជ្ជាជីវៈតាមចំណង់ចំណូលចិត្ត ដើម្បីកសាងអនាគតដ៏រឹងមាំ និង(២) ការសន្ទនាដោយបើកចំហក្នុងគ្រួសារ ដើម្បី ជំរុញការប្រាស្រ័យទាក់ទងរវាងអាណាព្យាបាល និងកូនៗ លើប្រធានបទសិទ្ធិ សុខភាពផ្លូវភេទ និងសុខភាពបន្តពូជ។ ការបង្កើនភាពស្និទ្ធស្នាល និងការយល់ដឹងក្នុងគ្រួសារលើបញ្ហាទាំងនេះ គឺជាខែលការពារកុមារីពីហានិភ័យផ្សេងៗ និងជួយឱ្យពួកគេរស់នៅដោយភាពជឿជាក់។
បណ្តុះគ្រាប់ពូជនៃសមភាពកិច្ចសហការរវាងអង្គការនារីដើម្បីសន្តិភាព និងអគារមរតកសង្គមរាស្ត្រនិយម នាថ្ងៃនេះ មិនត្រឹមតែជាការចែករំលែកចំណេះដឹងប៉ុណ្ណោះទេ ប៉ុន្តែគឺជាការ បណ្តុះគ្រាប់ពូជនៃសមភាព និងការផ្តល់តម្លៃដល់មនុស្សគ្រប់រូបក្នុងស្រុកបុរីអូរស្វាយ-សែនជ័យ។ នៅពេលដែលផ្នត់គំនិតសង្គមត្រូវបានបើកចំហ កុមារី នឹងមានឱកាសកាន់តែច្រើនក្នុងការបង្ហាញសមត្ថភាព ក្លាយជាអ្នកដឹកនាំ និងជាកម្លាំងចលករដ៏សំខាន់ក្នុងការអភិវឌ្ឍសង្គមជាតិទាំងមូល។
March 13, 2026
Photo and text by Sreng Lyda
Documentation Center of Cambodia Archives
https://photos.app.goo.gl/eSmCt6vN6JEZS5Am8